ក្រោយត្រូវគេស្គាល់ថាជាប្រទេសដែលមានការរីកចម្រើនផ្នែកឧស្សាហកម្មយានយន្ដធំ នៅអាស៊ាន, ឥណ្ដូនេស៊ី, ថ្មីៗនេះ បានធ្វើការស្វាគមន៍ក្រុមហ៊ុនរថយន្ដអន្ដរជាតិធំៗ ២ រួមមាន Ford និង Hyundai មកដាក់វិនិយោគ ទុនលើការផលិតអាគុយឡានអគ្គិសនីបន្ថែមទៀត។ 

តាមការចុះផ្សាយពី Reutre កាលពីពេលថ្មីៗនេះ បានឲ្យដឹងថា ក្រុមហ៊ុនផលិតរថយន្ដធំៗ ២ រួមមាន Ford អាមេរិក និង Hyundai កូរ៉េ ខាងត្បូង កំពុងតែពិភាក្សាជាមួយនឹងរដ្ឋាភិបាលប្រទេស ឥណ្ឌូនេស៊ី ក្នុងការដាក់វិនិយោគទុន ធ្វើរោងចក្រផលិតអាគុយឡានអគ្គិសនី ក្រោយពីមើលឃើញសក្ដានុពលនៃ រ៉ែនីកែល nickel ដែលជាសមាសធាតុផ្សំបង្កើតអាគុយ ក្នុងប្រទេសនេះ។ 

តាមសម្ដីរបស់លោក Airlangga Hartarto រដ្ឋមន្ដ្រីក្រសួងពាណិជ្ជកម្មឥណ្ឌូនេស៊ី បានឲ្យដឹងថា៖ 

“ក្នុងប្រទេសរបស់យើង មានវត្ថុធាតុដើម ដែលស្របតាមតម្រូវការនៃការចង់បាន ជាប្រយោជន៍សម្រាប់ពង្រីកការវិនិយោគលើបច្ចេកវិទ្យា យានយន្ដអគ្គិសនីនេះ”

យ៉ាងណាមិញ កាលពីខែ កក្កដា កន្លងទៅ Ford និង Hyundai បានចុះអនុស្សរណកិច្ចសហប្រតិបត្តិការ ជាមួយរដ្ឋាភិបាល ឥណ្ឌូនេស៊ី ដើម្បីសាងសង់រោងចក្ររុករកសមាសធាតុ nickel ផងដែរ។ លោក Hartarto បានបន្ថែមថា៖

“ក្រៅតែពី Hyundai កាលពីពេលថ្មីៗនេះ ឥណ្ឌូនេស៊ី ក៏បានជួបពិភាក្សារឿង វិនិយោគទុន ពីក្រុមហ៊ុនផលិតថ្ម ល្បីឈ្មោះរបស់កូរ៉េខាងត្បូង LG Energy Solution មកបង្កើតរោចក្រផលិតអាគុយឡានអគ្គិសនីនេះដូចគ្នា។”

គួររំឭកថា ប្រទេស ឥណ្ឌូនេស៊ី គឺជាអ្នកផ្គត់ផ្គង់សមាសធាតុ nickel និង ជាអ្នកផ្គត់ផ្គង់លើ ការផលិតឧបករណ៍កង់ដង់ ឬ semiconductor ធំមួយក្នុងទីផ្សារយានយន្ដអន្ដរជាតិ ជាពិសេស ជាប្រទេសដែលឈានមុខធំមួយខាង ឧស្សាហកម្មយានយន្ដប្រចាំអាស៊ាន បន្ទាប់ពី ថៃ បើយោងតាមស្ថិតិសិក្សា ពី Globe Newswire ប្រចាំឆ្នាំ ២០២២ ដូច្នេះការស្វាគមន៍ វិនិយោគទុនថ្មីនេះ អាចជាផ្លូវមួយជួយឲ្យ ឥណ្ដូនេស៊ី ហក់ឡើងមួយកម្រិតទៀតផងដែរ។ 

អត្ថបទ៖ Andra